Home / All / Tulu Sariyath ತುಳು ಸರಿಯತ್ತ್-‘ತುಲು

Tulu Sariyath ತುಳು ಸರಿಯತ್ತ್-‘ತುಲು

ತುಳು ಸರಿಯತ್ತ್-‘ತುಲು’

ಮಸ್ತ್ ವರ್ಸೊದ ಪಿರಾವು ಬೇತೆ ದ್ರಾವಿಡ ಬಾಸೆಲೆನ ಒಟ್ಟುಗು ನಮ್ಮ ತುಲು ಬಾಸೆಲಾ ಪೊರ್ಲುಡೇ ಮೆನ್ಕ್‌ದಿಪ್ಪು. ಆಂಡ ನಮ್ಮ ತುಲುನಾಡ್ ಕನ್ನಡ ರಾಜೆರೆನ ಕೈ ಸೇರ್ನಗ ಅಕುಲು ಮುಲ್ಪ ಕನ್ನಡ ಬಾಸೆನ್ ಬುಲೆಪಾಯೆರ್. ಕನ್ನಡೊದ ಬರವುಗು ಮುಲ್ಪ ಎಡ್ಡೆ ಈಟ್ ಪಾಡ್ದ್ ಬುಲೆಪಾಯೆರ್. ತುಲು ಜನೊಕ್ಲಾ ಕನ್ನಡ ಕಲ್ಪೊಡೇ ಪನ್ಪಿನ ಕಾನೂನು ಕನತೆರ್. ಆ ಪೊರ್ತುಡು ತುಲು ಬರವು ಅಡಿಕ್ ಬೂರುಂಡ್. ನಮ್ಮ ತುಲು ಜನೊಕುಲು ಸಂಕ್ಯೆಡ್ ಕಮ್ಮಿ ಇತ್ತಿನೆಡ್ದಾವರ ತುಲು ಬರವುನು ಒರಿಪಾದ್ ಬುಲೆಪಾಯೆರೆ ಆಯಿಜಿ.

ಇತ್ತ ನಮ ಕನ್ನಡ ಕಲ್ತ್‌ದ್, ಕನ್ನಡೊದ ಲಿಪಿಟ್ ತುಲು ಬರೆಪ. ಅಂಚನೇ ತುಲು ಪಾತೆರ್ನಗಲಾ ಕನ್ನಡೊದ ಉಚ್ಚಾರೊನು ಪತೊಂದು ಅಯಿತ ಪ್ರಬಾವೊಡು ತುಲು ಉಚ್ಚಾರ ಮಲ್ಪುವ. ತುಲು ಲಿಪಿತ ಬಗ್ಗೆ ಆಸಕ್ತಿ ಇತ್ತಿನಕುಲು, ತುಲು ಬರವು ಬರೆಪಿನಕುಲು, ತುಲು ಅಬಿಮಾನಿಲು ಒಂತೆ ಎನ್ನ ಪಾತೆರ ಕೇನ್ವರ?

ನಮ್ಮ ತುಲು ಬಾಸೆಗ್ 53,56 ಅಚ್ಚರೊಲು ಬೋಡಾ? ಕಾಲಿ 32 ಯಾವಂದೇ? ದಾಯೆ ಪಂಡ ತುಲು ಪಾತೆರ್ನಗ ಮಲ್ಲ ಪ್ರಾನೊ ಉಚ್ಚಾರ ಮಲ್ಪುನ ಕ್ರಮ ಇಜ್ಜಿ. ಇಡೀ ತುಲು ಬಾಸೆದ ಪಾತೆರ ಎಲ್ಯ ಪ್ರಾನೊಡೇ ನಡಪುಂಡು. ಉದಾರ್ಮೆಗ್: ಕ,ಗ, ನ, ಚ,ಜ,ಲ ಇಂಚ. ಮಲ್ಲ ಪ್ರಾನೊ ಪಂಡ್‌ದ್ ಕನ್ನಡೊಡು ಉಪ್ಪುನ ಖ, ಛ, ಥ, ಧ ಇಂಚಿತ್ತಿನ ಅಚ್ಚರೊಲು ತುಲುಟು ಗಲಸುನ ಕ್ರಮ ಇಜ್ಜಿ. ಒವೆನ್ ನಮ ಪಾತೆರುವನಾ ಅವೆನೇ ಬರವುಡು ಕನಪಿನ ಎಡ್ಡೆ ಕ್ರಮ ಅತ್ತೇ? ಪಾತೆರುನಿ ಒಂಜಿ ರೀತಿ, ಬರವುಡು ಕುಡೊಂಜಿ ರೀತಿ ಪನ್ಪಿನ ಬೇದೊ ಬೋಡೇ? ಎನ್ನ ಲೆಕ್ಕೊಡು ತಿರ್ತ್ ತೋಜಾಯಿನ ಅಚ್ಚರೊಲು ಮಾತ್ರ ತುಲು ಬರವುಗು ಯಾವು? ಅ ಆ ಇ ಈ ಐ ಉ ಊ ಎ ಏ ಒ ಓ ಔ ಅಂ = 13 ಕ ಗ ಚ ಜ ಞ ಟ ಡ ತ ದ ನ ಪ ಬ ಮ ಯ ರ ಲ ವ ಸ ಹ =19 ಇಂಚ ಒಟ್ಟುಗು 32 ಅಚ್ಚರೊಲು ಯಾವು ಪಂದ್ ತೋಜುಂಡು. ಮಲ್ಲ ಪ್ರಾನೊದ ಅಚ್ಚರೊಲು ಬೊಕ್ಕ ‘ಋ ಋ ಷ ಳ ಅಃ ‘ ಇಂಚಿತ್ತಿನ ಅಚ್ಚರೊಲು ನಂಕ್ ಅಗತ್ಯ ಇಜ್ಜಿ.

ಬರವು ದಾಂತಿನ, ಕನ್ನಡ ಪಾತೆರ‌್ರೆ ಗೊತ್ತಿಜ್ಜಂದಿನ, ಕಾಲಿ ತುಲು ಮಾತ್ರ ಪಾತೆರುನ ಹಲ್ಲಿದ ಪ್ರಾಯೊದ ಜನೊಕ್ಲೆಡ ಪೋದು ಪಾತೆರ್‌ಂಡ ನಿವಾಯಿನ ತುಲು ಒವು ಪಂದ ಗೊತ್ತಾಪುಂಡು. ಅಕುಲು ಒಲ್ಪಲಾ ಮಲ್ಲ ಪ್ರಾನೊ ಗಲಸಂದೆ ತುಲು ಪಾತೆರ್ವೆರ್. ಅವ್ವೇ ನಿಜವಾಯಿನ ತುಲು.

‘ತುಳು’ ಪನ್ಪಿನ ಶಬ್ದ ತಪ್ಪು. ಉಂದು ನಮ ಕನ್ನಡ ಬೊಕ್ಕ ಸಂಸ್ಕೃತೊದ ಪ್ರಬಾವೊಡು ಮಲ್ತೊಂದಿತ ವ್ಯವಸ್ತೆ. ದಾಯೆ ಪಂಡ ‘ಳ’ ಪನ್ಪಿನ ಅಚ್ಚರೊ ಕನ್ನಡ ಅತ್ತ್‌ಂಡ ಸಂಸ್ಕೃತೊದ. ‘ತುಲು’ ಪನ್ಪಿನನೇ ನಿಜವಾಯಿನ ಪ್ರಯೋಗ. ದಾಯೆ ಪಂಡ ನಮ ಪಾತೆರ್ನಗ ‘ತುಲು’ಂದೇ ಪನ್ಪ. ಅವು ‘ತುಳು’ ಅತ್ತ್. ದ್ರಾವಿಡ ಬಾಸೆಲಾಯಿ ತೆಲುಗು, ತಮಿಲ್, ಮಲಯಾಲಿಡ್ದಲಾ ‘ಲ’ಕಾರ ಪ್ರಯೋಗ ಎಚ್ಚಿಗೆ ಉಂಡು. ನಮ ತುಲು ಬುಲೆಚಿಲ್‌ದ ಬಗ್ಗೆ ಯೋಚನೆ ಮಲ್ಪುನಗ ಬಾಸೆದ ಮೂಲ ತಿರ್ಲ್‌ನ್ ಒರಿಪಾವುನಂಚಿ ಗಮನ ಕೊರೊಡು. ಇಜ್ಜಿಂದಾಂಡ ಬಾಸೆದ ಒರು ಬದಲಾದ್ ಬೇತೆ ಬಾಸೆದ ಕನ್ನಡಿಡ್ ನಮ್ಮ ಬಾಸೆನ್ ತೂಪುನ ಪರಿಸ್ತಿತಿ ಬರು. ಅಂಚ ಆಯೆರೆ ಬಲ್ಲಿ ಅತ್ತೇ? – ಇರ್ವತ್ತೂರು ಗೋವಿಂದ ಬಂಡಾರಿ

 

Reference: beauty of Tulunad

Leave a Reply