Home / All / Majondundu Tulu Mannda Sothulu

Majondundu Tulu Mannda Sothulu

ಮಾಜೊಂದುಂಡು ತುಳು ಮಣ್ಣ್‌ದ ಸೊತ್ತುಲು

ಕುಲ ಕಸುಬು ತುಳುನಾಡ್‌ದ ಪಿರಾಕ್‌ದ ಬದ್‌ಕ್. ಒಂಜಿ ಜೀವನೊಗು ಎಂಚಿನ ಮಾತಾ ಬೋಡಾ ಅವೆನ್ ಪೂರಾ ತಯಾರ್ ಮಲ್ಪೆರೆ ಉದ್ಯೋಗೊಲೆನ ಪಟ್ಟಿ ಮಲ್ತ್‌ದ್ ಅವೆನ್ ಒಂಜೊಂಜಿ ಸಮುದಾಯೊಗ್ ಪಟ್ಟ್‌ದಿತ್ತೆರ್ ನಮ್ಮ ಹಿರಿಯಾಕ್‌ಲ್. ಏಪ ಜಗತ್ತ್ ಆಧುನೀಕರಣದ ಮರ್ಗಿಲ್‌ದ್ ಮಾಲ್‌ಂಡಾ ಅಯಿಡ್ಡ್ ಬೊಕ್ಕ ಕುಲಕಸುಬು ಸಂಸ್ಕೃತಿಗ್ ಪೆಟ್ಟ್ ಬೂರ್‌ಂಡ್. ಈ ಪೊಸ ಯುಗೊತ ಪೊಸ ಬೆಳವಣಿಗೆ ಎಡ್ಡೆಲಾ ಆಂಡ್. ಆಂಡ ಅಯಿತ ಒಟ್ಟಿಗೆ ನಮ್ಮ ಪಿರಾಕ್‌ದ ಕೆಲವು ಸೊತ್ತುಲು ಆಧುನೀಕರಣೊದ ಗಾಳಿಗ್ ತಿಕ್ಕ್‌ದ್ ಮಾಜೊಂದು ಬತ್ತ್‌ಂಡ್.

ಮರಿಯಾಲೊಡು ಉಪಯೋಗ ಮಲ್ಪುನ ಕೊರುಂಬು ಇತ್ತೆ ತೋಜುನನೇ ಕಮ್ಮಿ. ಕೊರುಂಬು ತಯಾರ್ ಮಲ್ಪುನವೇ ಒಂಜಿ ಕಲೆ. ಇತ್ತೆ ಕೊರುಂಬು ತಯಾರ್ ಮಲ್ಪುನಕುಲುಲಾ ಇಜ್ಜೆರ್, ಗಲಸುನಕುಲುಲಾ ಇಜ್ಜೆರ್. ಕಂಗ್‌ದ ಪಾಲೆಡ್ ಮಲ್ಪುನ ಮುಟ್ಟಾಳೆ ಇತ್ತೆದ ಜೋಕ್ಲೆಗ್ ಗೊತ್ತುಂಡಾ? ತುಳುನಾಡ್‌ದ ಪರಂಪರೆದ ಸಂಕೇತ ಆದಿತ್ತಿನ ಮುಟ್ಟಾಳೆ ಬೆನ್ನಿ ಸಂಸ್ಕೃತಿದ ಕಿರೀ ಟಲಾ ಅಂದ್. ಆಂಡ ಇತ್ತೆ ಮುಟ್ಟಾಲೆ ಕಮ್ಮಿ ಆವೊಂದು ಬೈದ್‌ಂಡ್. ನನ ಒಂತೆ ವರ್ಸೊ ಕರಿಂಡ ಮುಟ್ಟಾಳೆ ಇತಿಹಾಸೊ ಸೇರುಂಡು.

ಅರಿತ ಮುಡಿ ಕಟ್ಟುನವು ತುಳುನಾಡ್‌ದ ಮಾಮಲ್ಲ ಹಿರಿಮೆ. ಬಯಿ, ಕಲ್ಲೆ, ಅರೆಬಯಿ, ಬಲ್ಲ್, ಕೊದಂಟಿ ಇಂಚಿತ್ತಿನ ಸೊತ್ತುಲೆನ್ ಗಲಸ್‌ದ್ ಮುಡಿ ಕಟ್ಟುನ ಪೊರ್ಲು ತೂಯೆರೆ ಬಾರೀ ಸೋಕು. ಬೆನ್ನಿ ಕಮ್ಮಿ ಆವೊಂದು ಬತ್ತಿಲೆಕನೇ ಮುಡಿ ಕಟ್ಟುನವುಲಾ ಕಮ್ಮಿ ಆವೊಂದು ಬೈದ್‌ಂಡ್. ಬಾರ್ ದಿಂಜಾದ್ ದೀಯೆರೆ ತಿರಿ (ತುಪ್ಪೆ) ಕಟ್ಟುನವು ನನೊಂಜಿ ಕಲೆ. ಕೊಯ್ಲ್ ಮುಗಿಸಾತ್‌ಗ್ ಇಲ್ಲ್‌ದ ಜಾಲ್‌ಡ್ ತುಪ್ಪೆ ಕಟ್ಟೊಂದಿತ್ತೆರ್. ಇತ್ತೆ ಏತ್ ಇಲ್ಲಡ್ ತಿರಿ ಉಂಡು? ಉಂದು ಕೆಲವೊಂಜಿ ಉದಾರ್ಮೆಲು ಆತೆ. ನನಲಾ ಏತೇತೋ ಸೊತ್ತುಲು ಮಾಯಕ ಆವೊಂದುಂಡು. ಅಗೋಳಿ ಕರ, ನೀರಡ್ಯರ, ಅಡ್ಯರ, ಕೋರಯಿ, ಗುಂಡಿ ಬಿಸಲೆ, ರೆನ್ನಿ ಬಿಸಲೆ, ಕಡ್ಯ, ಕೊಡಪಾನ, ಕಾರ್‌ದ ಕಡ್ಯ, ಕುಜಿಲ್, ಮುಟ್ಟಿ, ತೂರಿ, ಕುದುಪೆ, ಬಾವಡೆ, ರೊಟ್ಟಿದ ಓಡು, ಗದ್ದವು, ತಿಬಿಲೆ.. ಇಂಚ ಏತೇತೋ ಸೊತ್ತುಲು ನಮ್ಮ ಜನೊಕುಲೇ ತಯಾರ್ ಮಲ್ತೊಂದಿತ್ತೆರ್. ಇತ್ತೆ ಉಂದು ಪೂರಾ ಮಾಜಿದ್‌ಂಡ್ ಅತ್ತ್‌ಂಡ ಮಾಜೊಂದುಂಡು. ಬಿಸಲೆ, ಕರಟ್ ನಾನಾ ನಮೂನೆ ಇತ್ತ್‌ಂಡ್. ಏತೋ ಬಗೆತ ಮರಾಯಿ ಇತ್ತ್‌ಂಡ್. ಇತ್ತೆ ಒವುಲಾ ಇಜ್ಜಿ. ನಮ್ಮ ಬದ್‌ಕ್ ಆಧುನೀಕರಣದ ಮರ್ಗಿಲ್‌ಗ್ ಜಾರೊಂದು ಪೋನಗ ಯಾಂತ್ರೀಕೃತ ಸೊತ್ತುಲೇ ನಮ್ಮ ಉಸುಲಾವೊಂದು ಬತ್ತ್‌ಂಡ್. ಕುಲ ಕಸುಬುಲೆಗ್ ಆಯಿನ ಪರಿಸ್ಥಿತಿನ್ ತೂನಗ ‘ಪುಟ್ಟುನಗ ಬತ್ತಿನ ಕೆಬಿಡ್ದ್‌ಲಾ ಬೊಕ್ಕ ಬತ್ತಿನ ಕೊಂಬೇ ಗಟ್ಟಿಯತ್ತೇ’ ಪನ್ಪಿನ ಮನಸ್ಥಿತಿ ಇತ್ತೆದ ಜನೊಕುಲೆಡ ಉಂಡು.

ದುಂಬು ಒಂಜಿ ಸೊತ್ತು ಮಲ್ಪೆರೆ ಮಸ್ತ್ ದಿನ ಬೋಡಿತ್ತ್‌ಂಡ್. ತಿಕ್ಕುನ ಆದಾಯ ಕಮ್ಮಿ. ಅಂಚಾದೇ ಯಂತ್ರೊಡು ತಯಾರಾಪುನ ಸೊತ್ತುಲು ಸುಲಬೊಡು ಒಗ್ಗುನಗ ಪಿರಾಕ್‌ದ ಸೊತ್ತುಲು ಏರೆಗ್ ಬೋಡು! ‘ಪೆತ್ತ ದೇರ್‌ನಯಿಟೆ ಪೋಯಿಜಿಂಡ.. ಪೋಯಿನಯಿಟೆ ದೇರುನು’ ಪನ್ಪಿನ ಗಾದೆದ ಸ್ಥಿತಿ ಇತ್ತೆದ. ನಮ್ಮ ಮಣ್ಣ್‌ದ ಬೇತೆ ಬೇತೆ ಕುಸುಬುಲೆನ ಪೊರ್ಲು, ತಿರ್ಲ್‌ನ್ ತೆರಿಂಡ ಉಂದು ಪುಸ್ತಕೊದ ಪುಟ ಸೇರ‌್ಯೆರೆ ಬಲ್ಲಿ. ನನ ದುಂಬಾನಗ ಕಂಡ ಪಂಡ ದಾದಂದ್ ಪುಸ್ತಕೊಡು ತೋಜಾವುನ ಕಾಲ ಬರ‌್ರೆ ಬಲ್ಲಿ. ಆಧುನಿಕತೆ ನಂಕ್ ಬೋಡು. ಅಯಿತ ಒಟ್ಟಿಗೆ ನಮ್ಮ ಸಂಸ್ಕೃತಿದ ಎಗ್ಗೆಲುಲಾ ಒರಿಯೊಡು. ಮಾತಲಾ ಯಂತೊಡು ಆಪುಂಡು ಪನ್ಪಿನ ಭ್ರಮೆ ಮಾಜಿದ್ ಮಾನವ ಶ್ರಮೊಕ್ಕು ಬಿಲೆ ತಿಕ್ಕೊಡು.
Courtesy :     Beauty of Tulunad | ಲೇಖನ : ಸುಲೋಚನಾ ನವೀನ್, ಕೊಟ್ಟಾರ, ಕುಡ್ಲ

 

About Pavanesh D

Pavanesh D

Leave a Reply