Don't Miss
Home / All / Kapu Puche adda bathnda artha Dade

Kapu Puche adda bathnda artha Dade

ಕರಿ ಪುಚ್ಚೆ ಅಡ್ಡ ಬತ್ತಿನ ಅರ್ಥ ದಾದ?

ಕಾರ್ತಿಮಾರ್ ಕರಿಯಣ್ಣನ ಕಾರಿ ಬೋರಿ ಗುಡ್ಡೆಗ್ ಮೇಯೆರೆ ಬುಡ್‌ನ, ಕಿದೆಕ್ ಬರಂದೆ ನಾಲ್ ದಿನ ಆಂಡ್. ಪಜಿರ್ ಕೊಡಿತ್‌ದ್, ಪಂತಿ ಬುಳೆದಿತ್ತಿನ ಗುಡ್ಡೆಡೇ ಬೋರಿ ಉಪ್ಪೊಡು ಪಂಡ್‌ದ್ ಕರಿಯಣ್ಣೆ ಬೋರಿನ್ ನಾಡೊಂದು ಪಿದಡಿಯೆರ್. ಇಲ್ಲದ ಮೊಟ್ಟಿಕಲ್ಲ್ ಜತ್ತ್‌ದ್ ನಾಲ್ ಪಜ್ಜ ಪೋತೆರಾತೆ- ಒಲ್ತೋ ಬತ್ತಿನ ಕರಿಯ ಕಂಟ ಪುಚ್ಚೆ ಸಾದಿಗಡ್ಡ ಬಲಿತೊಂದು ಪೋಂಡು. ಪುಚ್ಚೆದ ಶಕುನನ್ ಎನ್ನೊಂದು ಕರಿಯಣ್ಣೆ ಬಾರೀ ಅನುಮಾನೊಡೇ ಬೋರಿನ್ ನಾಡಿಯೆರೆ ದುಂಬಾಯೆರ್. ಗುಡ್ಡೆ ಪದವು ತಿರ್ಗ್ ಯೆರ್. ಓಣಿ ಒರುಂಕುಡು ತಿರ್ಗ್‌ಯೆರ್. ಕಣಿ, ಗುರ್ಮೆನ್ ನಿಲ್ಕ್‌ದ್ ತೂಯೆರ್. ಕಾರಿ ಬೋರಿ ತಿಕ್ಕಿನೇ ಇಜ್ಜಿ. ಬಚ್ಚಿದ್ ಸೋತು ಸುಣ್ಣಾಯೆರ್. ಬಯ್ಯಾಂಡ್. ಬೇಜಾರ್‌ದ್ ಇಲ್ಲಗ್ ಪಿರ ಬತ್ತೆರ್. ಮಾಡ್‌ಡಿತ ಚಿಟ್ಟೆಡ್ ಕುಲ್ಲುದು ಬಚ್ಚಿರೆದ ತಂಚಿನ್ ಬುಡ್ಪಾದ್ ಬಚ್ಚಿರೆ ಅಗ್ಯೆರೆ ಸುರು ಮಲ್ತೆರ್. ಆತೊರ್ತುಗೆ ಆಪೆದಿಲ್ಲದ ನೀಲಮ್ಮಕ್ಕ ಬತ್ತ್‌ದ್ ಒಂಜಿ ತುಂಡು ಪುಗ್ಗೆರೆ ಕೊರ್ಲೆ ಪಂಡ್‌ದ್ ಕೇನೊಡ.. ಪಾತೆರ್ ಪಾತೆರ್‌ದ್ ನೀಲಮ್ಮಕ್ಕಡ ಕಾರಿ ಬೋರಿ ತಪ್ಪಾಯಿನ ಸಂಗತಿ ಪಂಡೆರ್. ಅಪಗ ಆರ್ ಪಂಡೆರ್- ‘ನಾರಾಯಣ ಬಟ್ರೆನ ಪೆತ್ತದೊಟ್ಟಿಗೆ ಏರೆನವೋ ಒಂಜಿ ಬೋರಿ ನಾಲ್ ದಿನೊಡ್ದಿಂಚಿ ಆರೆನ ಕಿದೆಕ್ ಬರೊಂದುಂಡುಗೆ. ಅವು ಇರೆನ ಬೋರಿಯಾ?’

ಕರಿಯಣ್ಣೆ ಸೀದಾ ಬಟ್ರೆನ ಕಿದೆಕ್ ಪೋದು ತೂಪೆರ್, ಆರೆನ ಕಾರಿಬೋರಿ ಬಟ್ರೆನ ಪೆತ್ತದೊಟ್ಟಿಗೆ ಆರಾಮೊಡು ಜೆತ್ತೊಂದೆ. ಕರಿಯಣ್ಣಗ್ ಒಲ್ತು ಪಿಸ್‌ರ್ ಬತ್ತ್‌ಂಡ್‌ಂದ್ ಇಜ್ಜಿ. ಜೆತ್ತ್‌ನಾಡೆಗೆ ಬೆತ್ತದ ಉರುಬಡುಟು ರಡ್ಡ್ ಬುಡ್ದು ಕಾರಿ ಬೋರಿನ್ ದೇರೊಂದು ಇಲ್ಲಗ್ ಬತ್ತೆರ್. ಕಿದೆಕ್ ಕನತ್‌ದ್ ಅಯಿನ್ ಕಟ್ಟೊಡಾತೆ, ಅಪಗ ಆ ಕರಿಯ ಕಂಟ ಪುಚ್ಚೆ ಕಿದೆತ ಅಟ್ಟೊಡಿತ್ತಿನ ಬಯಿತ ರಾಶಿದ ಇಡೆಡ್ದ್ ಲಾಗಿದ್ ಮೀಯ್ಯಾಂ… ಮೀಯ್ಯಾಂ… ಪನೊಂದು ಬಲಿತ್ತ್‌ಂಡ್.!
ಲೇಖನ : ಸಂಜೀವ ಶೆಟ್ಟಿ ಚೆನ್ನಂದಿಲ, ಮೂಡುಬಿದಿರೆ

About Pavanesh D

Pavanesh D

Leave a Reply