Home / All / ಮಣ್ಣ್‌ನ್ ಮೋಕೆ ಮಲ್ಪುನೆನ್ ಕಲ್ಪುಗನಾ?

ಮಣ್ಣ್‌ನ್ ಮೋಕೆ ಮಲ್ಪುನೆನ್ ಕಲ್ಪುಗನಾ?

ಮಣ್ಣ್‌ನ್ ಮೋಕೆ ಮಲ್ಪುನೆನ್ ಕಲ್ಪುಗನಾ?

ಅವ್ವೊಂಜಿ ಗಂಟೆ ಗಡಿಯಾರನೇ ದಾಂತಿ ಕಾಲ. ಕೊಟಕೋರಿ ದೊಂಬುಗು ಕಂಟೆಲ್ ಮಿತ್ತ್ ಅನ್ನಾದ್ ಬಾನ ತೂನಗ ಸೂರ್ಯ ದೇವೆರೆ ನಡು ನೆತ್ತಿದ ಮಿತ್ತ ಬತ್ತೆರ್‌ಂಡ ಬೆನ್ನಿ ಬೇಲೆದಕ್ಲು ಮಧ್ಯಾಹ್ನದ ವನಸ್‌ಗ್ ಕೈಕಾರ್ ದೆಕ್ಕುನ ಪೊರ್ತು. ಉಂಡುದು ಒಂಜೀತ್ ಕನ್ನ ಚಾ ಪರೊಂದು ಕುಡ ಕಂಡ ಜತ್ತೆರ್‌ಂಡ ಸೂರ್ಯ ದೇವೆರ್ ಪಡ್ಡಾಯಿ ಕಡಲಾಬರಿಟ್ ಕಂತ್‌ನಗನೇ ಬೇಲೆ ಮುಗಿವು. ಇಲ್ಲಗ್ ಬತ್ತ್ ತರೆಕ್ ಮೆಯಿಕ್ ಮೀದ್ ಚಾವಡಿಡ್ ಕುಲ್ಲೊಂದು ಇಲ್ಲದಕ್‌ಲ್ ಒಟ್ಟಾದ್ ಪಟ್ಟಾಂಗ ಪಾಡೊಂದಿತ್ತ್‌ಂಡ ವನಸ್‌ದ ಪೊರ್ತು ಬತ್ತಿನನೇ ಗೊತ್ತಾವಂದ್. ನುಂಗೆಲ್ ಸಾರ್‌ಡ್ ಬಂಜಾರ ಉಂಡ್‌ದ್ ಕಾರ್ ನೀರ್‌ದ್ ಜೆತ್ತ್‌ಂಡ ಪುಲ್ಯ ಆಯಿನವೇ ತೆರಿಯಂದ್.

ಇಡೀ ದಿನತ ಬದ್‌ಕ್ ಪಂಡ ಅವು ಮಣ್ಣ್‌ದೊಟ್ಟಿಗೆ ಮಣ್ಣಾದ್ ಪೊಂರ್ಬೊಂದು ಮನಸ್‌ಡ್ ದಿಂಜಿನ ಕುಸಿನ ಉರ್ಕಾವೊಂದು ಕಾಲ ಕರಿಯೊಂದಿತ್ತಿನ ಕಾಲ. ಅತಿಯಾ ಸೆದ ಬೆರಿ ಪತ್ತಂದೆ ಇತ್ತಿನೆನ್ ಪಟ್ಟೊಂದು ತಿನೊಂದು, ಇತ್ತಿನ ಇಲ್ಲ್‌ದ ಮಣ್ಣ್‌ದ ಬಾಜಿರೊ ನೇ ಅರಮನೆ ಮಂಚ ಪಂದ್ ಎನ್ನೊಂದು ಬದ್‌ಕೊಂದಿತ್ತಿನ ಜನಮಾನಿ ಇತ್ತಿನ ಕಾಲ.

ಕಾಂಡೆ ಲಕ್ಕ್‌ದ್ ಆಣ್‌ಲು ಬೆನ್ನಿದ ಬೇಲೆಗ್ ಪೋಯೆರ್‌ಂಡ ಪೊಣ್ಣುಲು ಇಲ್ಲ್‌ದ ಬೇಲೆ ಮಲ್ತೊಂದು ಕಮ್ಮೆನದ ಉನಸ್ ತಯಾರ್ ಮಲ್ಪುವೆರ್. ಒಟ್ಟು ಸೇರ್‌ದ್ ಉನ್ಪೆರ್. ವರ್ಸೊಡೊಂಜಾತ್ ಪರ್ಬೊಲು, ಮದಿಮೆ, ಮಸಿರಿಲು.. ಕುಸಿ ಕುಸಿಟೇ ಆಚರಣೆ ಮಲ್ತ್‌ಂಡ ಇಡೀ ವೊರ್ಸೊ ಪೋಯಿನವೇ ಗೊತ್ತಾವಂದ್.

ಇನಿ ಕಾಲ ಬದಲಾತ್‌ಂಡ್. ಬೆನ್ನಿದ ಬೇಲೆನ್ ಬುಡುದು ಪೇಂಟೆದ ರಂಗ್‌ದ ಬದ್‌ಕ್‌ದ ಬೆರಿ ಪತ್ತಿನ ನರಮಾನಿ ಆ ರಂಗ್‌ದ ಬದ್‌ಕ್ ಎಕ್ಕಂದೆ ಉಪ್ಪುನಗ ನಿರಾಸೆಗ್ ಬಲಿಯಾದ್ ಬದ್‌ಕ್‌ದ ನೆಮ್ಮದಿ ಹಾಲ್ ಮಲ್ತೊನ್ನ ಪೊರ್ತು ಉಂದು.

ಕಾಸ್ ಒಂಜೇ ಬದ್‌ಕ್ ಅತ್ತ್ ಪಂದ್ ನಂಬೊಂದಿತ್ತಿನ ಆ ಕಾಲೊಗ್ಲಾ, ಕಾಸ್ ಒಂಜೇ ಬದ್‌ಕ್ ಪಂದ್ ನಂಬ್‌ದಿನ ಈ ಕಾಲೊದ ಬದ್‌ಕ್‌ಗ್ಲಾ ಇರ್ಲ್ ಪಗೆಲ್‌ದಾತ್ ವ್ಯತ್ಯಾಸ. ರಾತ್ರೆ ಬೊಲ್ಪಾವೊಡಾಂಡ ಕಾಸ್ ಆವೊಡು. ನಾಲ್ ಜನೊತ ಎದ್‌ರ್‌ಡ್ ರಂಗ್ ರಂಗ್‌ದ ಬದ್‌ಕ್ ನಡಪಾವೊಡು. ಬೆಂದ್‌ಂಡ ಕಾಸ್ ಆವಂದ್.. ಅಂಚಾದ್ ಅಡ್ಡ ಸಾದಿ ಪತ್ತ್‌ಂಡಲಾ ಮಲ್ಲೆಜ್ಜಿ ಪನ್ಪಿನ ಸ್ಥಿತಿ. ಒರಿಯನ್ ತೂದು ಒರಿ ಈ ವಿಷ ಚಕ್ರೊದ ಸಾದಿನೇ ಪತ್ತ್‌ದ್ ಒಟ್ಟಾರೆ ಸಮಾಜೊನೇ ಗೊಂದಲದ ಗೂಡಾದ್ ಬದಲಾತ್‌ಂಡ್. ಏರೆಗ್ಲಾ ನೆಮ್ಮದಿ ಇಜ್ಜಿ.. ಏರೆಗ್ಲಾ ಆರೋಗ್ಯ ಇಜ್ಜಿ.

ಸೊರ್ಗೊನು ನಮ ತೂತ್‌ಜ. ಆಂಡ ಬೂಮಿದ ಮಿತ್ತ್ ಎಡ್ಡೆ ಕೆಲಸ ಮಲ್ತಿನಾಯೆ ಸೊರ್ಗೊಗು ಪೋಪೆ ಪನ್ಪಿನ ನಂಬಿಕೆ ನಮ್ಮ. ಇತ್ತ್ ನಂಕ್ ತೋಜುಂಡು ನಮ ಬೂಮಿದ ಮಿತ್ತ್ ಇತ್ತಿನ ಸೊರ್ಗೊದಂಚಿನ ಬದ್‌ಕ್‌ನ್ ನಮನೇ ನಮ್ಮ ಕೈಯ್ಯಾರೆ ಅತಿಯಾಸೆಗ್ ಬಲಿಬೂರ್ದ್ ನಾಶ ಮಲ್ತೊಂಡ..!

ಭೂಮಿದ ಮಿತ್ತ್‌ದ ಸೊರ್ಗೊ ಪಂಡ ಅವು ಬೆನ್ನಿದ ಕ್ಷೇತ್ರ. ಪಿದಯಿ ದೇಶೊಡು ಮಲ್ಲ ಮಲ್ಲ ಬೇಲೆಡ್ ಇತ್ತಿನಕ್ಲ್‌ಲಾ ಪೂರಾ ಬುಡುದು ಕುಡ ಊರುಗು ಬತ್ತ್‌ದ್ ಬೆನ್ನಿ ಬೆನ್ಪುನೆನ್ ತೂನಗ ಉಂದು ಸತ್ಯ ಪಂದ್ ತೋಜುಂಡು. ನಮ ಮಾತ್ರ ಮಣ್ಣ್‌ದ ಕಮ್ಮೆನೊನು ಮದತ್‌ದ್ ಬಾನೊಗು ರಾಯೆರೆ ಪೋಯಿನ ಫಲೊನೇ ಇನಿತ ನರಕದ ಬದ್‌ಕ್. ನಮ ಏರ್ ಮಣ್ಣ್‌ನ್ ಮೋಕೆ ಮಲ್ಪೆರೆ ಪಿದಾಡುವನಾ ಆನಿಗ್ ಲೋಕೊಡು ಶಾಂತಿ, ನೆಮ್ಮದಿ ನಿಲೆಯಾಪುಂಡು. Courtesy : © Beauty of Tulunad | ಲೇಖನ: ಫಾಲಾಕ್ಷ ಸುವರ್ಣ ಬೆಳ್ತಂಗಡಿ

About Pavanesh D

Pavanesh D

Leave a Reply